Qendra për Mirëkuptim dhe Bashkëpunim Institucional reagon ndaj dhunës mbi nxënësit

Qendra për Mirëkuptim dhe Bashkëpunim Institucional ka dënuar ashpër dhunën mbi nxënësit shqiptarë nga personat të maskuar në autobusin numër 58, i cili transportonte nxënësit shqiptarë për në fshatrat Çiflik dhe Sveta Petkë, ndërsa ka kërkuar nga Ministria e Punëve të Brendshme ndërmarrjen e aksionit të shpejtë dhe të ashpër ndaj huliganëve që shkaktuan këtë incident të rëndë

. “Është koha e fundit që qeveria, ministritë përkatëse, hetuesia dhe gjyqësia të kalojnë prej fjalëve në vepra, nga kalkulimet boshe politike në veprime konkrete ndëshkuese, përderisa situata nuk ka dalë komplet nga kontrolli dhe qytetarët nuk kanë ndërmarrë hapin e vetorganizimit dhe hakmarrjes për këto veprime makabre me elemente fashiste”, thuhet në reagimin e QMBI.

Duke pasur parasysh serinë e ngjarjeve të kësaj natyre kohëve të fundit, QMBI kërkon dorëheqjen e menjëhershme të ministres për punë të Brendshme, Gordana Jankullovska. “Po ashtu, shpresojmë që përfundimisht të vetëdijesohen edhe përfaqësuesit politik shqiptarë në Qeveri, në drejtim të gjykimit më të ashpër të terrorit që po zhvillohet mbi shqiptarët, ndërmarrjes së hapave konkretë dhe gjetjes së mekanizmave për të ndërprerë këtë dhunë sistematike. QMBI kërkon që në mënyrë të përshpejtuar të ndryshohet dhe ashpërsohet politika ndëshkuese ndaj të miturve madhorë dhe prindërve të tyre, si një hap i mundshëm drejt eliminimit të manifestimeve të tilla të dhunshme”, thuhet në reagimin e QMBI.