Policia ka marrë në pyetje rreth 30 persona

MPB ka njoftuar se të nesërmen, pas incidentit më të rëndë, atij që ndodhi në autobusin me numër 58, ku u lënduan nxënësit shqiptarë të fshatit Çiflik, nëpër stacionet policore janë marrë në pyetje 25 persona, që dyshohet të jenë përfshirë në incidentet e fundit, ndërsa me pesë-gjashtë persona është biseduar në vendin e ngjarjes



Shkup, 9 mars - Policia ka marrë në pyetje rreth 30 persona në drejtim të zbardhjes së incidenteve që ndodhën në autobusët e kryeqytetit dhe identifikimit të autorëve. Ministria e Punëve të Brendshme ka njoftuar se të nesërmen, pas incidentit më të rëndë, atij që ndodhi në autobusin me numër 58, ku u lënduan nxënësit shqiptarë të fshatit Çiflik, nëpër stacionet policore janë marrë në pyetje 25 persona, që dyshohet të jenë përfshirë në incidentet e fundit, ndërsa me pesë-gjashtë persona është biseduar në vendin e ngjarjes. Pas bisedave informative, të gjithë personat e ftuar në stacionet policore të kryeqytetit i janë nënshtruar procesit të identifikimit nga ana e të lënduarve ose personave të tjerë që kanë qenë prezent në vendet e incidenteve.

"Deri në orët e pasdites së premte, punonjësit policor kanë biseduar me rreth 30 persona. Shpresojmë që me dëshmitë e tyre dhe me informatat që do të sigurohen mëtutje, të zbardhet identiteti i autorëve, megjithatë në këtë moment nuk mund themi se kur mund të priten paditë e para. Gjithçka varet nga ritmi i identifikimit të autorëve nga ana e viktimave dhe personave të tjerë që kanë qenë prezent në vendngjarje", tha Ivo Kotevski, zëdhënësi i Ministrisë së Brendshme. (I.I./KOHA)