‘Shejhul islamët e kohës: Google, Facebook, Twiter’

Ali Xhuma, kryemyftiu i Egjiptit, u ka bërë thirrje të gjithë muslimanëve, sidomos dijetarëve muslimanë, që të hapin dialogun rreth ndikimit në rritje të internetit, gjegjësisht të rrjeteve sociale, transmeton gazeta boshnjake Saff.

Në fakt, dihet se interneti sot është duke u përdorur si një medium kryesor nga ana e dijetarëve muslimanë, por, megjithkëtë, interneti është edhe një vend shumë i përshtatshëm për paraqitjen e ideve të rreme dhe të gabuara në lidhje me Islamin dhe muslimanët.

Ali Xhuma ka paralajmëruar se rrjetet sociale, sikur që janë Facebook-u dhe Twiter-i, përbëjnë një sfidë të madhe për muslimanët e rinj, të cilët në këto rrjete kanë mundësi të ballafaqohen me informata të gabuara apo dezinformata të shumta.

Ndër të tjerash, ai ka theksuar: “Shpeshherë ndodh që muslimanët e rinj, shfrytëzues të internetit, t’u besojnë informatave që është shumë vështirë t’ju verifikohet vërtetësia. Kjo krijon mundësinë që ato të humben në detin e informacioneve dhe dezinformacioneve

. E jona është që t’i mësojmë të rinjtë tanë se si të notojnë në detin e këtyre dezinformatave.” Duke e pasur parasysh ndikimin e internetit në kohën tonë, shfrytëzojmë paraqitjen e shejhut të nderuar, Ali Xhuma, për ta përçuar një mesazh tek lexuesit tanë dhe tek të gjithë muslimanët shqiptarë: Kujdes prej ku dhe prej kujt e mësoni fenë tuaj.

Feja është jetë, andaj kujdesuni për jetën tuaj.